死慳死抵終於有自己間屋了~~~
比左首期，仲有d剩錢諗住去裝修下間屋，上一手業主住左二十幾年都無執過間屋，所以基本上要全屋拆哂，水喉、電線、鋁窗都老化左要換過，最多呢3年唔去旅行每日帶飯返工，只要間屋裝修得市市正正就可以了。估唔到，惡夢就咁開始左了‧‧‧‧‧‧
2011年7月中，搵左間係旺角叫先X鋁質既裝修公司。同負責人傾好哂野，confirm 左裝修會由8月頭開始，55個工作天，即大約10月中完工。負責人將條數分左做裝修費(4期)同換窗費(2期)，話開工前我要每邊找左第一期錢(40%同50%)，師傅先會開工，開工前一個禮拜我就過左數比佢。
第一次搞裝修，心情真係好緊張，但都好開心，雖然知道有一段時間會好忙，但間屋所有野都係自己落手落腳揀，所以一早就列好張清單，一放假就會去旺角、灣仔、深圳，周圍睇下d裝修野。而我租住緊果度同間屋好近，所以每日一收工就會去睇下施工進度。
(一) 工程開始
8月頭工程開始喇！師傅好快就拆哂d野，然後開始舖電線、水管，我都好快mark左d電制位等佢地可以做野順利d。負責人話想幫我慳d錢，會同我上大陸買磁磚，仲話會幫我免費打煤氣坑。
8月中既時候，師傅話要幫我訂廚櫃同門了。因為廚房會改做開放式，師傳話會畫張圖樣比我睇。追左師傅2個星期，佢先比左幅畫左一半既圖我睇，仲要唔係我要求既設計。我比左自己手畫既圖佢，同埋電磁爐、微波爐、抽油煙機、大眼雞洗衣機同埋雪櫃既尺寸比佢。因為唔想煮野食會有油煙攻出廳，我畫埋塊玻璃，叫師傅要幫我整埋。師傅話好，會再畫一幅正式圖樣，連埋尺寸比我confirm先至訂做，仲叫我去旺角東達，揀門之餘，仲要揀埋d廚櫃防火膠板同人造石面既顏色型號比佢去訂。佢話幫東達買慣買熟，d料都ok。過左幾日我就比哂d型號師傅了。D窗話咁快就裝好了，我都好滿意。負責人叫我比埋另一期(50%)換窗錢清左條數先，我都過左數比佢。過左2日，負責人話要買料同出糧比其他師傅，叫我找第二期錢(30%)，我都即日過左數比佢。
9月頭既時候，磁磚由大陸送到落黎，師傅好快就舖好了，雖然有少少舖得唔好，但整體上都叫做ok。我問師傅幾時比廚櫃圖樣我睇同confirm，佢居然話比我知已經根據我比佢幅圖訂做左個廚櫃，我話我又未睇過、又未對過d尺寸，點解唔比我check過先去做。佢話佢已經check過無問題，叫我唔使擔心。我最緊張就係個廚房，點可能唔擔心呀？
(二) 問題出現
9月中既時候，d門送到黎喇！到所有門框、封口線同門裝哂上去，我發現每一道門既門框裝到離哂地，封口線又裝到離框，門較位開爛哂之餘，d門仲要上歪左同刮門框。師傅話會修補下，點知原來係用d木條辟入門框底，唧上灰色膠遮住；封口線離框果d罅又係咁唧上灰色膠遮住；大門仲衰，除左之前講既問題，成個門框上到歪哂，仲要斜左入屋，閂埋門就見到道門凸左出黎，同門框頂位有成大條罅；廁所門連門都閂唔到，仲要刮哂地。
我同師傅講之前d野整得好地地，點解而家搞到咁，叫佢要換過d門框。師傅堅持唔肯換，話係我揀d門唔好；d門框特登做到離地，費事拖地既時候整濕d門會好快霉；門較用人手開係有d爛架喇，用d灰色膠補一補咪得囉；d門就會再同我上過。至於大門門框，係因為起屋既時候個位本身已經斜左入屋，唔係佢既問題喎。我唔接受師傅既解釋，就叫左個負責人上黎睇。負責人同師傅講既野一樣，好明顯係夾過口供，兩個一唱一和。
我真係好嬲，話未見過上得咁肉酸既門，而且係師傅叫我去東達揀，d門又係佢訂，有問題點解收貨既時候唔出聲，而家有問題先話係東達d門唔好；封口線係師傅自己cut長短，加上封口線有1,2條裝得貼框，其他全部裝到離哂框；門較位又上爛哂，一定係手工既問題，唔關d門事。為左d門，我同佢地嘈過好幾次，負責人同師傅堅持唔會換。我唔想拖慢工程進度，就暫時唔追究住。
10月頭，人造石面同廚櫃送埋黎了。撕開紙皮睇下人造石面既顏色，我明明訂既係LA186雲彩白架，點解變左紫色既？！d廚櫃組件，驟眼睇好似嵌唔埋喎！我即刻打比負責人，佢話如果真係錯左色，佢會免費幫我換過；至於廚櫃組件要裝左上去先知。
第2日，廚櫃組件已經裝左下半部份，仲要上埋人造石面同裝埋水龍頭。我即場問師傅點解明知塊石面係錯，仲要裝上去？佢話上哂d野比我用住先。我話未入住喎，你唔係夾硬上哂d野迫我接受呀？師傅話會再訂過人造石面，都係$1,800左右，貨到一定會幫我換過。
等師傅走左，我就周圍睇下。望望下發現放大眼雞洗衣機個位，有條2寸高既石屎係度。我即刻移走前面d野，拉尺度下，放唔落部洗衣機喎！Check埋廚櫃組件上半部份，自己點拼都拼唔埋，一睇就知尺寸有問題啦；廚房2隻窗前果塊雲石，凸左成寸出黎，搞到個廚櫃拍唔埋牆。我果刻心情真係跌到落谷底，同埋十萬個憤怒。發生乜野事呀？
我即刻打比負責人，佢d態度極差，聲大大好話佢未睇過d野我就嘈佢。我約佢第2日上黎自己睇下。第2日，我朋友同埋2個親戚 (我地都係差唔多時間搵呢間野裝修，又係爛尾收場，遲d同大家share)、師傅都在場。
先由門開始傾，佢地死都唔肯認係手工問題。
到傾人造石面顏色，師傅堅持話人造石面顏色係跟足東達本catalog色版訂。我問佢既然係跟型號訂，我仲比埋樣版，點會訂得錯？！講多幾講，負責人先話報價既錢係東達訂太貴，cover唔到，所以要係大陸訂，但已經跟足東達本catalog我揀既型號顏色去訂。我話格圖得5毫子咁大，點對色呀？點解唔用我比既樣板對呀？負責人同師傅堅持話已經跟足隻色，係張紙反光我地先覺得顏色唔同。我話你係大陸訂既話，點解唔比果間野既色版我揀？負責人話唔想同我嘈，會免費幫我換過。
再傾洗衣機位果條凸左2寸高出黎既石屎。負責人話係煤氣公司打坑唔夠深，搞到煤氣喉管凸左2寸出黎，唔關師傅事，佢地仲用石屎封左條管，唔覺眼架。我話係師傅同媒氣公司夾打坑位，如果係媒氣公司有問題，點解佢唔出聲，而家放唔到洗衣機咁點？負責人同我講話大眼雞洗衣機係有腳架，一定放到入去。望住呢2個腦殘既人，我真係忍無可忍喇！我比左洗衣機本小冊子佢地自己睇，負責人都知無得再拗，話會幫我將成組廚櫃下半部份向廳推出少少，咁就放到洗衣機；煤氣喉如果要再做過，要起過哂d地磚，好大工程。算啦！放得入洗衣機就算了。
到傾廚櫃組件上半部份，負責人話要裝哂上去先，有問題到時再講；廚房2隻窗前凸左成寸出黎果塊雲石，會幫我打磨平滑，然後將個廚櫃拍到貼牆，仲拍哂心口會幫我搞埋塊玻璃。
過左2日，負責人打比我話要訂浴屏同出糧比師傅，叫我找第3期錢(20%)，我話搞好d野先找比佢，佢叫我信佢，仲拍哂心口話會搞好間屋。我諗住快快埋尾，就過左數比佢。點知過左數就出事喇‧‧‧‧‧‧
個廚櫃上半部份裝哂上左，但尺寸根本就有問題，師傅夾硬拆左廚櫃門，將佢劏開一塊塊，見有窿既地方，好似玩拼圖遊戲，補左上去，再唧d白色膠上去；組件與組件爭左成寸位，佢就辟塊木板入去；開錯左既電制位，就劏爛個廚櫃去就；仲要幫我上埋部抽油煙機，驚塌就係抽油煙機2邊上多幾口螺絲。而近窗貼牆果組櫃直頭上到歪哂。
至於窗前果2塊雲石，都唔知搵乜野野劏短，劏到九牙咁，仲無打磨平滑。
我打比負責人，佢真係360度變臉，好晦氣話得得得。
(三) 裝修爛尾
10月中，我放一個星期大假，諗住開始執野搬屋。日日落去間屋，根本就無人黎開工，間唔中有個電工上下電制、門鎖，但做2個鐘就走。d電制一係未上哂，一係上到歪哂，仲要面板冚唔埋；門鎖唔係歪，就係上爛左；廁所上果d雜物架，鑽爆哂d磚；就連晾衫d鐵通、窗簾軌都全部上歪哂。
我打比負責人叫佢上黎睇，佢話會幫我執好佢。我問個廚櫃點算先？佢就話d廚櫃係咁，死都唔肯換。又話我揀d磚唔好，所以一定會鑽爆。過左2日，佢仲email張單比我，話要收左d額外工程費，e.g. 訂玻璃錢、上冷氣機錢同打石屎錢。我同佢講之前講果d問題佢都未執過；果塊玻璃我又未見過；冷氣機明明話收1部錢，而家寫左收2部；清拆前已經講左要打石屎，打漏左又要計多我一次。我叫負責人改番張單條數，佢唔肯。我話我都比左9成錢你，無拖過你數。你幫我換過廚櫃有問題既組件，搞好哂d手尾，我一定找比你！佢唔肯，仲好惡話唔找數就會搵人執埋d野走。
本來10月中就要完工，一直拖到10月尾。呢段期間，佢地無人上黎開工，d野原封不動擺哂係間屋。我真係扯哂火，對住呢d人真係唔可以妥協，我打比負責人話佢一日未完工我都唔會找數比佢，第2日佢即刻搵人執哂d野走，間屋宣告爛尾~~~~~
我租緊既地方要交番比人，迫於無奈都要搬入個爛尾單位住。未執既野如下：
1. 廚房
- 廚櫃尺寸唔啱，夾硬安裝上去
- 廚下櫃灶台面人造石顏色錯左未換；電磁爐又未裝上
- 廚下櫃亦未裝固，出現成大條罅
- 廚房窗台石並未打磨平滑
- 廚房渠位封鋁框尺寸唔啱，出現大空隙，頂住廚櫃門
- 廚房灰色玻璃未裝，又未修補
2. 廁所
- 企缸位漏水
- 門檻出現空隙令水滲出客廳
- 磁磚：安裝雜物架時鑽爆d磚未換
- 鏡櫃：撞爛鏡櫃左下角之玻璃未修補
- 喉管：面盆櫃內之喉管固定裝置鬆脫，磁磚之空隙未修補
- 廁紙架：鬆脫又未固定
- 抽氣扇及廁板未裝上
3. 廳
- 廁所外之牆身及大門旁邊仲未油哂油
- 近廚房之橫樑位置、大門門框旁邊及廁所門框上之位置批盪唔平
4. 電制位及燈制
- 門口與客廳既燈制應該係2-WAY制，電路連接錯誤又唔整，由得d電線外露
- 近大門之燈制應該係2-WAY制+門口燈開關，用錯電制面板
- 全屋之電制位及燈制面板裝到歪哂同冚唔埋
- 洗衣機及電磁爐之電制面板未裝
- 劏爛廚櫃就電線位，電制位勉強安裝在廚櫃木板上
5. 門
- 房門、廁所門及大門既門框離哂地，封口線又離框，門較位開爛哂
- 大門成個門框上到歪哂，仲要斜左入屋，閂埋門就見到道門凸左出黎，同門框頂位有成大條罅
- 廁所門連門都閂唔到，仲要刮哂地
- 房門及廁所門及大門門鎖安裝錯哂又歪，有d鎖仲裝到爛哂、
- 大門門眼未裝
(四) 追討損失
我寫左信去消委會，之後負責人就email張單叫我找尾數之餘，仲要比番之前佢再訂過果塊人造石面既錢同打坑費，連埋之前計錯數唔肯改既額外工程費，總數變左尾數既double。消委會係呢件事上只係左手交右手既角色，搞左個幾月，之後更無埋下文。
負責人打黎追我數，我真係好嬲，你搞到我間屋咁，仲要聲大夾惡黎追數？一怒之下，12月頭，我就入左小額申索‧‧‧‧‧‧
2月頭進行第一次審訊，負責人無出現，個官就安排左3月中第二次審訊。
(五) 收數上門
2月中開始，有個唔識既男人打比我朋友叫佢找數。我朋友話間屋爛尾，點找尾數比佢？！個男人就話會了解下件事。第2次打比我朋友，就話佢自己都係做裝修，可以上黎報價執漏。我朋友拒絕左。第3次打比我朋友，已經講哂粗口要佢找數。我朋友無再聽佢電話，果晚我地就去左差館備案。
3月頭有一晚，有人勁拍我門。打開門見到2個男人 – 四眼同埋大叔。我問佢地係邊個，佢地話見搵我朋友唔到，想上黎了解下裝修件事。我話已經入左小額，有乜就去法庭傾；問佢地邊間公司，大叔話佢地係中介人，唔係收數公司，好想幫負責人解決件事。我問佢邊間公司同有無卡片，佢地話係私人既，唔會有，又話負責人好嬲，所以先唔自己同我傾。我話唔知佢地乜野人乜野背景，我會直接上負責人公司傾。大叔就話幫我安排好時間再覆我，然後留左個電話比我就走左了。
第2日，大叔打比我，叫我打比負責人傾左先。第2日我就打比負責人，佢居然又係追我錢。我話講左好多次，已經比左9成錢你，無拖過你數，你做左幾十年裝修，唔會睇唔出個廚櫃有問題呀？你幫我換過廚櫃有問題既組件，搞好哂d手尾，我一定找比你！佢唔肯，仲發惡話我揀錯人造石面顏色，已經免費幫我訂過，果度成$3千幾都無同我計。又話我好唔找果d額外工程費，一日我唔比錢都無得傾。仲話已經搵左收數公司追呢條數，收數公司追唔到，佢有辦法用其他途徑去追到我比為止，之後仲cut埋我線tim。
過左2日，大叔又打比我問傾成點，我話而家係負責人唔傾，合約寫明尾數係完工先要找，佢未做完野我點解要找比佢？！佢完成哂d野，我一定找哂比佢。叫佢有乜過幾日上庭同個官講，攞埋證據出黎，如果個官話係我既問題，我賠埋錢比埋堂費都仲得。第2日，大叔又打比我，聲大大話負責人要我比$4,000就開始執漏。仲話寫包單，如果負責人收左$4,000走左佬，佢公司會負責立張紙我，寫明尾數一舉out消。我真係好嬲，我同佢講自己底線係佢完成哂d野我先找數。到時我唔比，佢可以搵收數公司或者告我都無所謂，因為我唔會拖佢數。大叔見我企硬，就叫我立張紙寫底自己全名同身份證號碼，寫底有乜野要執，執完一定會找哂錢。我拒絕，話一早已經比哂要執既清單負責人，叫佢叫負責人比份contract我，我簽名就得。大叔發惡，話我唔想解決問題，叫我考慮星期一再覆佢。對住呢d腦殘既人，真係o徒GAS，我決定唔係再同佢地傾。
隔左4日，有人係我屋企門口大吵大鬧，又大力拍鐵閘，大叫找尾數。我即刻報左警。佢地嘈左好耐，我打開門原來係四眼同埋大叔。佢地講黎講去都係三幅屁，之後話下過星期再上黎。佢地走左無耐警察就到了，仲同我地落左案。
(六) 小心裝修黑店
黎緊唔知負責人用乜方法去追我數，但對住呢d不負責任、橫蠻無理、無視法律既裝修黑店，我真係極度憤怒。
大家搵裝修既時候一定要小心，最好當然係搵到間有信譽保證既裝修公司，如果擔心既話，可以去律師樓立張約，細節寫得清清楚楚，e.g. 用乜野牌子既料，完成邊幾項工程先要比錢etc，再搵公證行監工，比多1萬幾千當幫自己買個保障。
如果唔想搞咁多野，最好搵間有門市既裝修，雖然係貴少少，但人地打開門做生意，唔通唔驚d客嘈上門嚇走其他客咩？！最緊要係尾數部份預留多d。好似我咁，搵左間樓上舖，貪佢平果幾千蚊，點知搵著間無良裝修黑店，搞到自己煩足半年。日日望住間爛尾屋真係勁想喊，搵人執尾條數計過仲貴過有門市果d既報價。而家仲要搵公證行出番份報告先搵人執得尾，費事果間裝修黑店話係佢幫我搞番好間屋，然後告番我轉頭追我數。
至於小額果邊，我地無搞落去了。一黎公司太多野做無可能成日請假；二黎法官拒絕左我申請延期既要求；三黎就算判左我嬴，呢間無良裝修黑店連法律都唔驚，又邊會肯比錢？！佢間$1公司，最多咪執左再開過。